မြန်မာပြည်ရဲ့ ပထမဦးဆုံးသော Pro League ဘောလုံးပြိုင်ပွဲကြီး ပြီးခဲ့တဲ့ စနေနေ့က စပါတယ်။ လောလောဆယ်မှာ အသင်း ၈သင်းနဲ့ စတင်တာဖြစ်ပါတယ်။ ထူးထရိတ်ဒင်း ဦးတေဇရဲ့ Yangon FC, Alpine ဒေါက်တာစိုင်းရဲ့ ရတနာပုံ FC, UMFCCI ဥက္ကဌကြီးရဲ့ ဇေယျာရွှေမြေအသင်း, ကမ္ဘောဇဘဏ်ရဲ့ KBZ အသင်း, IBTC (Grand Royal) ရဲ့ ဥသာယူနိုက်တစ် အသင်း၊ Asia World ရဲ့ မကွေးFC, ယုဇနဦးဌေးမြင့်ရဲ့Southen Myanmar FC နဲ့ ဧရာဝတီတိုင်းသားတို့ရဲ့ Delta United အသင်းတို့ပဲဖြစ်ပါတယ်။ ပြီးခဲ့တဲ့ စနေနေ့ မွန်းလွဲပိုင်းကစလို့ Stage Show တွေနဲ့ ဖွင့်ပွဲအခမ်းအနားကို ခမ်းခမ်းနားနားကို ကျင်းပခဲ့တာပါ။ ဖွင့်ပွဲနေ့မို့ ပရိသတ်ကလည်း စိတ်ဝင်တစားကို ကွင်းလုံးပြည့်လျှံအောင် လာကြည့်ကြတယ်။
.
ကွင်းက တာဝန်ရှိသူတွေ စီစဉ်ထားမှု ညံ့ဖျင်းတာကြောင့် လက်မှတ်ဝယ်ထားပြီးသူများတောင် ကွင်းထဲဝင်ဖို့ အရမ်းကို ခက်ခဲခဲ့ပါတယ်။ ပရိသတ် သောင်းနဲ့ချီပြီး တဖွဲဖွဲလာနေကြတာကို ဆုံလည်နဲ့ တစ်ဦးစီ ဝင်လိ်ု့ရတဲ့ ဝင်ပေါက်ကလေး ကို ဂိတ်နေရာနှစ်ခုထဲမှာ လေးပေါက်သာ ဖွင့်ပေးထားခဲ့ပါတယ်။ ကိုယ်တို့ မြန်မာလူမျိုးများ ကလည်း အဆင့်အတန်းနိမ့်နေပါသေးတယ်။ သက်ဆိုင်ရာက စီစဉ်မှုညံ့ဖျင်းခဲ့ရင်တောင် စည်းကမ်းတကျ စနစ်ရှိရှိ အဆင့်ရှိရှိလေး တန်းစီ ဝင်ကြမယ်ဆိုတဲ့ စိတ်ထားမျိုးလေး နည်းနည်းမှကို မရှိကြဘူး။ ဝေး ၀ါး နဲ့ အော်ဟစ်ပြီး အပေါက်သေးသေးလေးကို အတင်းတိုးဝှေ့နေကြတော့ လဲတဲသူလဲ နဲ့ အနာတရတွေ ထိခိုက်မှုတွေ ရှိခဲ့ပါတယ်။ ဒီမိုကရေစီလို့သာအော်ဟစ်နေတာ ဒီလိုလူမျိုးတွေ သေနတ်နဲ့ပဲတန်တယ်လို့ တောင် စိတ်ထဲ အချဉ်ပေါက်သွားမိတယ်။
.
ရုံးကနေ ကိုမြင့်ကြိုင်အပြင်နောက်ထပ်ကလေးတစ်ယောက်ပါကြည့်ဖို့လိုက်လာတာ တိုးဝှေ့ရင်း သူတို့နဲ့ ကွဲသွားတယ်။ ကွင်းထဲရောက်တော့ နှစ်နာရီခွဲတော့မယ်။ တစ်ကွင်းလုံး လျှံနေပြီ။ ဇေယျာရွှေမြေ ကိုယ်စားပြု အဝါရောင်ဂျာစီတွေနဲ့ ပရိသတ်တွေက အထူးတန်းမြောက်ဖက်မှာ၊ အစိမ်းရောင် ဝတ်ထားတဲ့ ရန်ကုန်ပရိသတ်က တောင်ဖက်ခြမ်းမှာ။ ထိုင်စရာနေရာရှာရင်း ဇေယျာရွှေမြေ ပရိသတ်တွေ ကြားထဲ ရောက်သွားတယ်။ စတိတ်ရှိုးရှိတော့ ဆူညံပွက်ပြီး လူတွေကလည်း ထလိုက်ထိုင်လိုက် ရှုပ်ယှက်ခတ်နေတာကို သည်းခံပြီး ခဏထိုင်နေရတယ်။
.
သုံးနာရီကျော်ကျော်မှာ ဖွင့်ပွဲအခမ်းအနားလုပ်တယ်။ တော်တော်လေးကို ခမ်းနားအောင် စီစဉ်ထားတာပဲ။ ပြိုင်ပွဲက လေးနာရီမှာ စတယ်။ ပရိသတ်ကအားပေးကြတော့ ကစားသမားတွေကလည်း ကြိုးစား ကန်ခဲ့ကြပါတယ်။ အများမျှော်လင့်ထားတဲ့ ဇေယျာရွှေမြေအသင်းက ပထမ ဆယ့်ငါးမိနစ်လောက် ဦးဆောင် ကစားနိုင်ပေမဲ့ နောက်ပိုင်း ရန်ကုန်အသင်းက တဖြေးဖြေး ကစားကွက်မိလားပြီး လေးဂိုး ဂိုးမရှိနဲ့ နိုင်သွားတယ်။ ပရိသတ်တွေ စည်းကမ်းမရှိတာကို ထပ်ပြောချင်သေးတယ်။ ပွဲကစားချိန်မှာ ထိုင်လိုက်ထလိုက်လုပ်နေတာတို့ အသင်းအလံကြီးတွေကို အများမြင်ကွင်းကွယ်အောင် ဝှေ့ရမ်းနေတာတို့ အိုးစည်ဗုံမောင်းတွေကို Non-Stop ဆူညံအောင်တီးနေတာတို့၊ ကွမ်းတံတွေးထွေးထားတဲ့ ကြွပ်ကြွပ်အိတ်ကို လူကြားထဲ ပစ်ထဲလိုက်တာတို့ တွေ့နေရသေးတယ်။ ဒါမျိုးတွေ တဖြေးဖြေးနဲ့ ပျောက်ကွယ်သင့်ပြီ။
.
ဘောလုံးပွဲက Pro ဆိုရင် အားပေးတဲ့ ပရိသတ်ကလည်း ထိုက်တန်တဲ့ အဆင့်အတန်းတစ်ခုရှိသင့်ပြီ။ ကွင်းက သက်ဆိုင်ရာဝန်ထမ်းအဖွဲ့တွေလည်း လက်မှတ်ဝယ်ပြီး လာကြည့်တဲ့သူတွေကို မဆလခေတ် သမဝါယမ စာရေးမ ဆက်ခံသလိုမလုပ်ပဲ ကိုယ့်ရဲ့ Customer အဖြစ် ကိုယ့်ကို ထမင်းကျွေးနေသူတွေအဖြစ် လေးလေးစားစား Service ပေးသင့်ပြီ။
.
ဘာပဲဖြစ်ဖြစ် ပရိုစနစ်ဆိုတာကိုတော့ စလိုက်နိုင်ခဲ့ပါပြီ။ ကစားသမားလေးတွေလဲ အရင်က သုံးလေးသောင်း စာရေးစာချီ ရာထူးလောက်နဲ့ ဌာနတွေမှာ ကစားနေခဲ့ကြရာက အခုဆို တစ်လကို နှစ်သိန်းသုံးသိန်းကနေ ဆယ်သိန်းအထိရလာကြပါပြီ။ နည်းပြများလည်း ထိုနည်းလည်းကောင်းပါပဲ။ တစ်နှစ်တစ်နှစ်ကို ဒီ ပရိုအသင်းတွေက လစာအပါအဝင် ကုန်ကျစရိတ် သိန်း သုံးထောင်ကနေ ငါးထောင်အထိရှိမယ်လို့ မှန်းကြပါတယ်။ အခု ပွဲဦးထွက် MNL Cup က ပထမရရင် သိန်း ၅ဝဝရပါမယ်။ ကွင်းဝင်ကြေးကို တော့ အသင်းတွေက ၄၀%ရမှာပါ။ အထူးတန်းဝင်ကြေးက တစ်ထောင်၊ ရိုးရိုးတန်းက ငါးရာကျပ်ပါ။
.
အသင်းတစ်သင်းအနေနဲ့ ပျှမ်းမျှ တစ်ပွဲကို ဆယ့်ငါးသိန်းကနေ သိန်းနှစ်ဆယ်လောက်ရနိုင်ပါတယ်။ ဆိုတော့ အခုပွဲမှာ အသင်းတွေက ၁၄ပွဲကန်ရပါမယ်။ ကွင်းဝင်ကြေးအနေနဲ့ သိန်း ၂ဝဝနဲ့ သုံးရာကြား လောက်ရနိုင်ပါတယ်။ ဒါပေမဲ့ ပြဿနာက အခုနှစ်ပွဲကန်ပြီးတဲ့ အချိန်မှာ ကျွန်တော်တွေ့ရသလောက် ကွင်းထဲက ပရိသတ်ရဲ့ တစ်ဝက်လောက်က အသင်းတွေကို အားပေးဖို့ ပိုင်ရှင်တွေက သူတို့ ဝန်ထမ်းတွေ နီးစပ်ရာတွေကို လာအားပေးခိုင်းတဲ့ပုံပဲ။ ရန်ကုန်ပရိသတ်ဆို Air Bagan နဲ့ ထူးထရိတ်ဒင်းက ဝန်ထမ်းတွေ ကားကြီးကားငယ်နဲ့ လာကြတာ။ ဒုတိယနေ့ကဆိုလဲ ရတနာပုံ ပရိသတ်တစ်ဝက်က Alpine ကလူတွေ။ Southen ကို လာအားပေးကြတာက ဦးလှမောင်ရွှေကြီးတဲ့ ငါးအဖွဲကလူတွေ။ ဒါဆို ကွင်းဝင်ကြေးရတဲ့ ပိုက်ဆံရဲ့အနည်းဆုံး သုံးပုံတစ်ပုံက ကိုယ်ပေးရတဲ့ ပိုက်ဆံတွေလို ဖြစ်နေတယ်။
အဲဒီတော့ သူတို့ အသုံးစရိတ် တစ်နှစ်သိန်းသုံးထောင်ဆိုတာကို ဘယ်လို ပြန်ရှာရမလဲဆိုတာ ကျွန်တော်လဲ တွေးကြည့်လို့မရသေးဘူးဖြစ်နေတယ်။ ဒီနှစ်ထဲမှာ နောက်ထပ်ဖလားတစ်ခုရှိတယ်ထားလိုက်ပါဦး။ ဖလား နှစ်လုံးစလုံး ရတဲ့အသင်းမှ ဆုကြေးငွေက သိန်းတစ်ထောင်လောက် ကွင်းဝင်ကြေးက သိန်းလေးငါးရာ။ အသုံးစရိတ်ရဲ့ တစ်ဝက်ပဲရှိသေးတယ်။ ရတနာပုံက ဆရာစိုင်းကတော့ တစ်ရှယ်ယာ ငါးသိန်းနဲ့ သိန်းငါးထောင်ဖိုး အများကို ထုတ်ရောင်းပြီး အသင်းကို Public လုပ်မယ်လို့ဆိုထားပါတယ်။
.
တစ်နှစ်ကို အသင်းအမြတ်ရဲ့ ဆယ်ရာခိုင်နှုန်း Dividend ခွဲပေးမယ်လို့ ဆိုထားပါတယ်။ မမြတ်ရင်ပေးစရာမလိုဘူးလို့ ဆိုလိုတာလားမသိ။ ဒါဆို အတိုးမဲ့ ငွေသိန်းငါးထောင်လောက် အခြားလုပ်ငန်းတွေမှာ လှည့်သုံးနေဖို့ အခွင့်အလမ်းတစ်ခုပေါ့။ ဘဏ်ကချေးရင်တောင် အတိုးပေးနေရဦးမယ်။ ပိုင်လိုက်တာ။ ဘာပဲဖြစ်ဖြစ် အခုစတင်လိုက်တဲ့ ပရိုစနစ်လေးကို ရေရှည်ဘယ်လို တည်တံ့သွားအောင် တိုးတက်လာအောင် ဘာတွေ ဆက်လုပ်ကြမယ်ဆိုတာကတော့ စိတ်ဝင်စားစရာပါပဲ။
