Wednesday, April 30, 2008

ကုလားကြီးနဲ့ အရာကြီး

(ခ) တပ်မတော်သည် တပ်ပိုင်းဆိုင်ရာ ကိစ္စအားလုံးကို လွတ်လပ်စွာ စီမံခန့်ခွဲ စီရင်ဆောင်ရွက်ခွင့်ရှိသည်။ 

၂၀ (ဂ) တပ်မတော် ကာကွယ်ရေးဦးစီးချုပ်သည် လက်နက်ကိုင်တပ်ဖွဲ့အားလုံး၏ အကြီးအကဲဖြစ်သည်။

၂၃၂ (ခ) ၂ ကာကွယ်ရေးဝန်ကြီးဌာန၊ ပြည်ထဲရေးဝန်ကြီးဌာန နှင့် နယ်စပ်ရေးရာဝန်ကြီးဌာနများအတွက် ကာကွယ်ရေးဦးစီးချုပ်ထံမှ သင့်လျော်သည့် တပ်မတော်သားများ၏ အမည်စာရင်းကို ရယူရမည်။ (ဒါဆို ကာကွယ်ရေးဝန်ကြီးဆိုတာက တပ်ကြပ်ကြီးစာရေးသာသာပဲ ရှိတာပေါ့နော်)

အရေးပေါ်ကာလ

၄၁၂ (ခ) သမတသည် အမျိုးသာကာကွယ်ရေးနှင့် လုံခြုံရေးကောင်စီနှင့် ညှိနှိုင်းရာတွင်း အဖွဲ့ဝင်များ စုံညီစွားတက်ရောက်နိုင်ခြင်းမရှိပါက ကာကွယ်ရေးဦးစီးချုပ်၊ ဒုတိယ ကာကွယ်ရေးဦးစီးချုပ်၊ ကာကွယ်ရေးဝန်ကြီး၊ ပြည်ထဲရေးဝန်ကြီးတို့နှင့် ညှိနှိုင်းပြီး အရေးပေါ်အခြေအနေကို ထုတ်ပြန်ကြေငြာနိုင်သည်။

၄၁၇။ ……. အရေးပေါ်အခြေအနေ အကျိုးသက်ရောက်မှုမှာ နိုင်ငံတစ်ဝှမ်းလုံးဖြစ်ကြောင်းနှင့် အချိန်ကာလ သတ်မှတ်ချက်သည် အမိန့်ထုတ်ပြန်သည့်နေ့မှ တစ်နှစ်် ဖြစ်ကြောင်း ဖေါ်ပြရမည်။

၄၁၈ (က) ကာကွယ်ရေးဦးစီးချုပ်အား ဥပဒေပြုရေးအာဏာ၊ အုပ်ချုပ်ရေးအာဏာနှင့် တရားစီရင်ရေးအာဏာများကို လွှဲအပ်ကြောင်း ကြေငြာရမည်။ ကြေငြာသည့်နေ့မှစ၍ လွှတ်တော်အားလုံးနှင့် ဦးစီးအဖွဲ့များ၏ ဥပဒေပြုရေးဆိုင်ရာလုပ်ငန်းများ ရပ်ဆိုင်းထားသည်။ သက်တမ်းကုန်ဆုံးသည့်အခါ သက်ဆိုင်ရာ လွှတ်တော်များသည် အလိုအလျောက်ဖျက်သိမ်းပြီးဖြစ်သည်။

၄၁၈ (ခ) ကာကွယ်ရေးဦးစီးချုပ်အား နိုင်ငံတော်အာဏာကို လွှဲအပ်သည့်နေ့မှစ၍ ဖွဲ့စည်းပုံအခြေခံဥပဒေတွေ မည်သို့ပင် ပြဌာန်းပါရှိစေကာမူ သမတနှင့် ဒုတိယ သမတများမှအပ ဖွဲ့စည်းပုံအခြေခံဥပဒေနှင့်အညီ သက်ဆိုင်ရာ လွှတ်တော်များက၏ သဘောတူညီချက်ဖြင့် ခန့်အပ်တာဝန်ပေးထားသော အဖွဲ့အစည်းဝင်များ၊ ကိုယ်ပိုင်အုပ်ချုပ်ခွင့်ရ ဦးစီးအဖွဲ့ဝင်များအား တာဝန်မှရပ်စဲသည်။

၄၂၀ (ခ) ကာကွယ်ရေးဦးစီးချုပ်သည် အရေးပေါ်အခြေအနေ ကြေငြာထားစဉ်ကာလအတွင်း လိုအပ်သည့် နယ်မြေဒေသတွင် နိုင်ငံသားများ၏ မူလအခွင့်အရေးများကို လိုသလို ကန့်သတ်နိုင်သည် သို့ ရပ်ဆိုင်းထားနိုင်သည်။

၄၂၅ ကာကွယ်ရေးဦးစီးချုပ်က တာဝန်ကို ပြီးမြောက်အောင်ဆောင်ရွက်ခြင်း မပြုနိုင်သေးသဖြင့် သတ်မှတ်အချိန်ကာလ တိုးမြှင့်ပေးရန် အကျိုးအကြောင်းပြလျက် တင်ပြလာပါက သာမန်အားဖြင့် တစ်ကြိမ်လျှင် ခြောက်လအထိ နှစ်ကြိမ်တိုးမြှင့်ပေးနိုင်သည်။

၄၃၂။ အရေးပေါ်အခြေအနေထုတ်ပြန်ထားစဉ် ကာကွယ်ရေးဦးစီးချုပ်ကနိုင်ငံတော်အာဏာကို ကျင့်သုံးသော ကာလအတွင်း လိုအပ်သည့် အရေးယူဆောင်ရွက်မှုများပြုနိုင်ရန် အခွင့်အာဏာနှင့် လုပ်ပိုင်ခွင့်တာဝန်များ ပေးအပ်ခြင်းခံထားရသော အဖွဲ့အစည်းတစ်ရပ်ရပ်နှင့် ယင်းအဖွဲ့အစည်းဝင် တစ်ဦးဦး၏ တရားဝင်ဆောင်ရွက်ချက်များသည် အတည်ဖြစ်စေရမည်။ ယင်းတရားဝင်ဆောင်ရွက်ချက်များအပေါ် အကြောင်းပြုလျှက် တရားစွဲဆိုခြင်း မရှိစေရ။

(ဘာထူးလဲ လုပ်ချင်တဲ့အချိန်မှာ လုပ်ချင်တာလုပ်လို့ရတယ် မည်သို့ပင်ဆိုစေကာမူ ဆိုတာက ပါလာသေးတယ်။ အရင် အရေးအခင်းတွေမှာ ရိုက်နှက်ခံရင် အဖမ်းခံရရင် ပစ်သတ်ခံရရင် သေနတ်ပြပြီး အာဏာကို အဓမ္မယူထားတဲ့ စစ်အစိုးရ ဘာညာဆိုပြီး ပြောလို့ရသေးတယ်။ ဒီအခြေခံဥပဒေအတည်ဖြစ်ပြီး ပစ်သတ်ခံရရင် ပြည်သူတစ်ရပ်လုံးကထောက်ခံထားတဲံ့ အခြေခံဥပဒေအရ တရားဝင် ပစ်သတ်ခံရတာဖြစ်သွားပြီ။ နောက်မှ တရားတွေဘာတွေပြန်စွဲဖို့လည်းမစဉ်းစားနဲ့ ဘာလုပ်လုပ် တရားဝင်တယ်တဲ့)

27th Apr, 2008





















Monday, April 28, 2008

Beijing Olympic 2008










































































မဲရံုမဲရံုဆီကို

ငွေတစ်ထောင်နဲ့ဝယ်လာတဲ့ အခြေခံဥပဒေ မူကြမ်းလေးကို ဖင်ပြန်ခေါင်းပြန် သုံးလေးခေါက်ဖတ်လိုက် မျဉ်းကြောင်းတွေသားလိုက်နဲ့လုပ်ပြီးသကာလမှ တော်ရှာပါပေ့လိပ်မျိုးနွယ်တို့ရယ်လို့ ကောင်းချီးပေးလိုက်မိတယ်။ ဒါပေမဲ့အရေးမကြီးပါဘူး ကိုယ်မှတားလို့မရနိုင်တာ။ သူတို့ကလည်း တွက်ချက်ပြီး ကြိုတင်ပြင်ဆင်မှုတွေ လုပ်သလောက် လုပ်ထားတယ်ဆိုတာ အသိသာကြီးကို တွေ့နေရတာပဲ။

လူတွေအများစုကြားမှာ ဘယ်လိုမဲပေးမယ်ဆိုတာ ဝေတေဝါးတားဖြစ်နေကြတယ်။ ကျွန်တော်တို့ရော မဲပေးရမှာလား တစ်အိမ်တစ်ယောက်ပဲမဟုတ်ဘူးလားလို့ မေးတဲ့သူကလည်းမေးသေးတယ်။ ဒုက္ခ။ တစ်ချို့ကလည်း ကြက်ခြေခတ်ချင်ပေမဲ့ ပြန်သိနိုင်တဲ့နည်းလမ်းတွေ (ဥပမာ ကင်မရာတွေထားမယ်ဆိုပြီး)ကို ကြောက်ပြီး အမှန်လေးပဲခြစ်ရမလားဆိုပြီး တွေဝေနေကြတယ်။ ဘာပဲပြောပြောပါ။ ခမောက်ကို တံဆိပ်နှိပ်ခတ်ခဲ့ပြီးတဲ့ ဒီကာလတွေမှာ အရိုက်အနှက် အဖမ်းအဆီးမခံရပဲ သွေးမြေမကျပဲ ကန့်ကွက်ဆန္ဒပြလို့ရတဲ့ အခွင့်ကောင်းတစ်ခုလို့ မမြင်သင့်ဘူးလား။

ကိုယ့်ဘာသာ ယုံကြည်လို့ အမှန်ခြစ်ရင်တော့ တစ်မျိုးပေါ့။ အဲ ..ကန့်ကွက်ချင်ရင်တော့ မဲရုံကို ကိုယ်တိုင်သွားပြီး ကြက်ခြေခတ်ဖို့ လိုလိမ့်မယ်။ ခင်ဗျားမဲသွားမထည့်ရင် ခင်ဗျားကိုယ်စား သူတို့က ထောက်ခံမဲလုပ်လိုက်လို့ ရနိုင်တဲ့ အခြေအနေတွေရှိတယ်။ ဥပမာ နေရာတစ်ခုမှာ မဲပေးပိုင်ခွင့်ရှိသူ တစ်သောင်းမှာ ခြောက်ထောင်ပဲ မဲလာပေးတယ်ဆိုပါစို့။ မဲရုံပိတ်ချိန်မှာ ကြိုတင် အမှန်ခြစ်ထားတဲ့ မဲသုံးထောင်လောက်ကို ထည့်လိုက်ဖို့ အလွယ်လေး။ မဲလာပေးတဲ့သူတွေရဲ့ လက်မှတ်နဲ့ အမည်စာရင်းကို ပြန်ကြေငြာဖို့လည်းမလိုဘူးလေ။ 

Thursday, April 24, 2008

ပိတောက်နေရာ

စျေးသို့အသွား ဘွားကနဲ ပိတောက်ပန်းကို တွေ့သည်။ စျေးသည်၏ ဗန်းထဲတွင် ဘယ်အချိန်က ရောက်လာကြသည်မသိ။ မနေ့က ပိတောက်ပင်ပေါ်မှာ ယနေ့ ပန်းဆိုင်မှာ၊ ရေရာ အနိမ့်အမြင့် ပြောင်းလဲခဲ့ပြီ။ သို့သော် သူ့အဆင်းကား ဝင်းထိန်ထိန်ပင်။

သူဆင်းရဲမသည် ပန်းဆိင်ရှေ့တွင် ရုတ်တရက် လာရပ်သည်။ သူမျက်နှာသည် ပိတောက်ပန်းနှင့်အတူ ဝင်းထိန်လျက်။ မကြာမီ မိန်းမပျို၏ ဦးခေါင်းထက်တွင် ပိတောက်ပန်းလိုက်ပါသွားသည်။ သူဆင်းရဲမ၏ ဦးခေါင်းပေါ်တွင် ဖြစ်စေကာမူ ပိတောက်ပန်းကလေး၏ ရွှင်လန်းခြင်းကား ပျောက်မည် မဟုတ်ချေ။

နေရာ အနိမ့်အမြင့်ကို မှီ၍ အရောင်မပြောင်းခဲ့။ ဝင်းထိန်လျက်သာ။ ဤပန်းသည် အပြစ်ကင်းစင်သော နေရာ၌ ထာဝစဉ် ခေါင်းထောင်နေပေလိမ့်မည်။

(ပိတောက်မှသရဖီသို့ - တင်မိုး)

တန်ခူးလ

မခူးချင်စမ်းပါနဲ့
နှစ်ဆန်းခါတော်မီမို့
ဇမ္ဗော်ရည် ပြေပြေလိမ်းကာပ
ခပ်သိမ်းနယ်စုံစုံသို့
ပွင့်ငုံကိုလင့်ကုန်ကြတော့လို့
ခေါင်းကြွကာ ဆာဝေဝေနဲ့
သူလဲလေ လောကီသားလိုပ
ကြွားချင်လှပေလိမ့်မယ်။

တသိန်တင့်ပါဘိ
တိမ်မြင့် ရီပြာပြာက
ကြည်သာသာ ပင့်လေအဖြူးတွင့်ဖြင့်
တီတာတာ ပွင့်ရွှေဖူးငယ်တို့
လည်ယှက်ကာ ဘယ်ညာလူးလေတော့
သူတို့လို ဘယ်သူမြူးနိုင်ပါ့ 

ထူးပါဘိတယ်။ 

 

ဇော်ဂျီ

Tuesday, April 8, 2008

(၁၀)နှစ်ပြည့်

အခုတလောက thinker ဝင်ရေးသွားတဲ့ comment ထဲကလို ကိုးနတ်ရှင်နှိပ်စက်တာနဲ့ ဘလော့ရေးရတယ်ကို မရှိပါဘူး။ log in တောင် ဝင်လို့မရတာ။ မတတ်နိုင်ပါဘူး။ ဖြစ်ချင်တာ မဖြစ်တဲ့ဘဝမှာ ဖြစ်ချင်တာ ဖြစ်စမ်းကွာဆိုပြီး ကောလိပ်ဂျင်နေဝင်းလို ငြီးချင်းချရမလားမသိ။

ပြီးခဲ့တဲ့စနေနေ့ ဧပြီ(၅)ရက်က ကိုယ်တို့ ကုမ္ပဏီရဲ့ ၁ဝနှစ်ပြည့် ညစာစားပွဲလေးလုပ်ဖြစ်တယ်။ လူခုနစ်ဦးလောက် စလုပ်ခဲ့တဲ့ အဖွဲ့အစည်းလေးက အခုဆို ဝန်ထမ်း ရဝကျော်ရှိနေပြီ။ ဒါပေမဲ့ လုပ်သက်ဆယ်နှစ်ပြည့်တဲ့လူဆိုလို့ ကိုယ်တို့ founder သုံးယောက်ပဲကျန်တယ်။ ဘဝသံသရာရထားကြီးလို လူတွေက ဆင်းလိုက်တက်လိုက်နဲ့ ခရီးဆက်ခဲ့ကြတာပေါ့။ ဘာပဲဖြစ်ဖြစ် စိတ်ကျေနပ်ပါတယ်။ အတိုင်းအတာတစ်ခုအထိ အောင်မြင်ခဲ့တယ ်ဆိုပြီးလည်း အားရကျေနပ်ဖြစ်မိတယ်။ ၁ဝနှစ်တာခရီးဆိုပြီးတော့လည်း လေးငါးဆယ်ရွက် မှတ်တမ်းလေး ရေးထားဖြစ်သေးတယ်။

Dinner ညက ဝန်ထမ်းအသစ်တွေရော ဖိတ်ထားတဲ့ ဧည့်သည်တွေပါဖတ်ရအောင် စားပွဲတစ်ဝိုင်းကို တစ်အုပ်စီတင်ထားပေးသေးတယ်။ (၁၀)နှစ်ပြည့်တဲ့အချိန်မှာ တစ်ချိန်က ကိုယ်နဲ့ဒိုးတူပေါင်ဖက် ကုန်းရုန်းလုပ်ခဲ့သူတွေက အဝေးရောက်ကုန်ပြီ။ ဘာပဲဖြစ်ဖြစ် ဘွဲယူထားတဲ့ ပညာလေးနဲ့ပဲ သူများဆီမှာ ဝန်ထမ်းမလုပ်တော့ပဲ ကိုယ်ပိုင်အလုပ်လေးကိုပဲ တစိုက်မတ်မတ် လုပ်ချင်ခဲ့တဲ့ ဆန္ဒလေးကတော့ အထိုက်အလျောက်ပြည့်ခဲ့ပြီလို့ဆိုရမှာပေါ့။ ဒီဆယ်နှစ်တာ ကလည်း တကယ့်ကို ခရောင်းလမ်း ပါပဲ။ အခုပြန်တွေကြည့်ရင်တော့ ဆင်းရဲ ဒုက္ခတွေဟာ ကိုယ်တို့အတွက် ချိုမြိန်တဲ့ အမှတ်ရစရာလေးတွေပေါ့။