နှင်းစိုစိုတွင် ခွာညိုပန်းကလေးကို မိန်းကလေး ပန်ခဲ့သည်။ မိန်းကလေး၏ ယဉ်ကျေးသော အမူအရာသည် ခွာညိုပွင့် ယဉ်ယဉ်နှင့် လိုက်ဖက်လှသည်။
ခွာညိုပွင့်တွင် အယဉ်ကို မြင်တတ်သော မိန်းကလေး၏ စိတ်ဓာတ်ကို လေးမြတ်မိသည်။ ခွာညိုပွင့်၏ အလှသည် ဣနြေ္ဒရသည်။ သိမ်မွေ့သည်။ မော်ကြွားဟန် မရှိချေ။
ဖြူစင်သော နှင်းသည် ခွာညိုပွင့်ကလေး၏ မျက်နှာပေါ်တွင် လန်းဆန်းအောင် ဆွတ်လိုက်သည်။ ပြာမြမြ ခွာညိုသည် သိမ်မွေ့စွာ ပြုံးနေသကဲ့သို့ ရှိလေသည်။
တောစပ်ကလေး၌ ခွာညိုပန်သော မိန်းကလေးသည် ကျေနပ်သောအသွင် ကြည်လင်စွာ ပြုံးလေသည်။ သူနှင့် ခွာညိုသည် တစ်နှစ်မှ တစ်ခါသာ ဆုံရသည်။ သို့ရာတွင် ခဏဆုံရခြင်းကို ဘယ်အခါမှ မမေ့နိုင်ရှာပေ။
ကဗျာဆရာကလေးသည် ခွာညိုပွင့်အနီးသို့ ရစ်သီရစ်သီ လုပ်ကာ အလှအယဉ်ကို အကဲခတ်လေသည်။ သူ့နှလုံးသားတွင် သိမ်မွေ့ ယဉ်ကျေးသော ကာရန် မပွင့်ဖူးသဖြင့် တေးမဆိုနိုင်ဘဲ ရှိလေသည်။ ခွာညိုပွင့် အနီး၌ ယောင်လည်လည် လုပ်ကာ တေးအစအနများကို စပ်ဟပ်ကြည့်နေတုန်း ရှိလေသည်။
သူ့စိတ်ထဲ၌ မိန်းကလေးနှင့် ခွာညို ပနံရသကဲ့သို့ ကာရန်အလှနှင့် ပနံမရနိုင်သဖြင့် မကျေမချမ်း ဖြစ်နေရှာလေသည်။
ကဗျာဆရာလေး၏ နှလုံးသားတွင် အေးမြ ချမ်းမြေ့သောအခါ ကာရန်ကလေးများ အစီအရီ ဖူးပွင့်ပေလိမ့်မည်။
ပိတောက်မှ သရဖီသို့ (တင်မိုး)
No comments:
Post a Comment