EMBA Myanmar (7th Batch), Welcome

EMBA ညနေပိုင်းသင်တန်း အမှတ်စဉ်(ရ)ကို မနေ့က စတင်ဖွင့်လှစ်ပါပြီ။ မနေ့က သူတို့ရဲ့ Fresher Welcome ပေါ့။ EMBA ရဲ့ ထုံးစံအတိုင်း 7th batch ကို ကြိုဆိုဖို့ 6th Batch ကဆောင်ရွက်ရပါတယ်။ ဘာလိုလိုနဲ့ 7th batch တောင် ရောက်သွားပါရော့လား။ ကျွန်တော်တက်ခဲ့တာက 4th batchပါ။ သင်တန်းကာလ ၂နှစ်ပြီးဆုံးလို့ စာတန်းတင်တဲ့ ကိစ္စလဲ ပြီးပြီ။ နောက်လဆို ဘွဲ့တောင်ယူရတော့မယ်။ 

ကျွန်တော့်အနေနဲ့ ပထမဆုံး 1st Batch ကတည်းက တက်ချင်လွန်းလို့ ဝင်ခွင့်စာမေးပွဲဝင်ဖြေခဲ့တာပါ။ စဖွင့်တဲ့ အပတ်စဉ်ဆိုတော့ တက်ချင်တဲ့သူတွေအများကြီး ၀ိုင်းလျှောက်ကြတယ်။ရေးဖြေအောင်ပြီး interview မှာ ပြုတ်ကျန်ခဲ့ပါတယ်။ အဲဒီတုန်းက အသက် ၃၀ ပြည့်တယ်ဆိုရုံလေးရှိသေးတာကိုး။ မေးတာတွေ ကောင်းမွန် စွာ ဖြေနိုင်ခဲ့သော်လည်း အဆုံးသတ်မှာ ဒေါက်တာ ဒေါ်ခင်စန်းရီက you are quite young.... ဆိုပြီး interview မှာပြောပါတယ်။ အောင်စာရင်းကပ်တော့ ပြုတ်ကျန်ခဲ့ပါလေရော။ ဒါနဲ့ 2nd Batch မှာ မဖြေသေးပဲ စောင့်နေပါတယ်။ နောက်နှစ်ကျတော့လည်း မန္တလေးရုံးခွဲကိစ္စနဲ့ သင်တန်းခေါ်ချိန်မှာ မန္တလေး ရောက်နေတာနဲ့ 4th Batch ကြမှပဲ လျှောက်ဖြစ်တော့တယ်။

ကျွန်တော့်ကို EMBA တက်ချင်သူများ မကြာခဏ လာလာမေးလေ့ရှိကြတယ်။ ဘာတွေလိုသလဲ ကျောင်းတက်ရတာ ဘယ်လိုလဲ စသည် စသည်ဖြင့်ပေါ့ ... သူတို့ကို ပြောပြခဲ့တာတွေ တစ်ခြားသူများလဲ သိရှိနိုင်အောင် ဘလော့မှာပဲ ရေးထားလိုက်ပါမယ်။
 

ပထမအဆင့် လျှောက်လွှာတင်ခြင်း
ဒီသင်တန်းကို တက်ဖို့ လျှောက်လွှာတင်ချိန်မှာ အသက် ၃ဝပြည့်ပြီးဖြစ်ရပါမယ်။ မန်နေဂျာအဆင့် လုပ်သက် ၈နှစ် ရှိရပါမယ်။ နှစ်စဉ် ဇွန် ဇူလိုင်လောက်ဆို သတင်းစာက ကြော်ငြာနဲ့ သင်တန်းအတွက် လျှောက်ဖို့ ခေါ်ပါတယ်။ RC2 ပတ္တမြားဆောင် (ယခင်ကွန်ပျူတာတက္ကသိုလ် နဲ့ကပ်လျှက်) မှာ လျှောက်လွှာဝယ်ရမယ် ဖြည့်ပြီး တင်ရပါမယ်။ မြို့နယ် မရက ရုံးက ထောက်ခံစာကိုလဲ တင်ပေးရပါတယ်။ အဲဒီလိုယူဖို့ ရပ်ကွက်မှာ ပထမအဆင့် နေထိုင်ကြောင်းလျှောက်လွှာယူပြီး နောက်တစ်ဆင့် ရဲစခန်းမှာ ထောက်ခံစာယူရမယ် အဲဒီနှစ်ခုပြပြီး မရကမှာ ထောက်ခံစာယူရမှာပါ။
--------------------------------------------------------------------------------------------------------

ရေးဖြေစာမေးပွဲ
သတ်မှတ်ရက်မှာ ရေးဖြေစာမေးပွဲကို ဖြေရပါမယ်။ ရန်ကုန်တက္ကသိုလ်ပင်မဝင်းအတွင်းက စီးပွားရေးတက္ကသိုလ် main မှာ ဖြေရပါတယ်။ နံနက် ၉နာရီကနေ ၁၂နာရီအထိ ဆက်တိုက် English, Maths, Logic တို့ဖြစ်ပါတယ်။ တစ်နာရီဆီ ဖြေရတာပါ။ GMAT စာမေးပွဲမေးခွန်းတွေပါပဲ။ GMAT စာအုပ်တွေ ကိုကြိုတင် လေ့လာထားရင် ဖြေနိုင်ပါတယ်။
---------------------------------------------------------------------------------------------------------------

Interview

ရေးဖြေအောင်တဲ့သူတွေက Referee 2ယောက်ဆီက ထောက်ခံစာနှစ်စောင် တင်ပေးရပါတယ်။ တစ်ဦးက ကိုယ့်ရဲ့ Academic ဖက်ကပါ။ ပါမောက္ခ ဌာနမှူးလောက် ဖြစ်ဖို့လိုပါတယ်။ နောက်တစ်ဦးက အလုပ်နဲ့ ပတ်သက်တဲ့ ဖက်ကပါ။ ကိုယ့်အလုပ်ရှင် MD, Director စသည်ဖြင့် တစ်ဦးဦးကို ရေးထိုးစေရမှာ ဖြစ်ပါတယ်။ (လျှောက်လွှာဝယ်ကတည်းက ပေးထာတယ်။ ဖြည့်ပြီး လက်မှတ်ထိုး တံဆိပ်တုံးထုပြီး ပြန်တင်ရုံပဲ) ပြီးတော့ နောက်တစ်ခုက ကိုယ့်ရဲ့ Bachelor Degree ရခဲ့တဲ့ ကျောင်းက နောက်ဆုံးနှစ်ရဲ့ အမှတ်စာရင်း (သို့) Grading ကို တင်ပြရပါတယ်။
Interview ကို မနက်ပိုင်းနဲ့ ညနေပိုင်း နှစ်သုတ်ခွဲပြီးလုပ်ပါတယ်။ တစ်ချိန်ထဲမှာ ဆရာကြီး ဆရာမကြီးတွေက အဖွဲ၂ခုခွဲပြီး တစ်ပြိုင်နက်ထဲ စစ်ဆေးပါတယ်။ ကိုယ်ကျတဲ့အချိန်မှာ ကျတဲ့ အဖွဲ့နဲ့ ဝင်တွေ့ပြီး ဖြေရုံပါပဲ။

Interview မှာ အောက်ပါအချက်တွေကို ကြည့်ပါတယ်

Personality and Appearance - ပျံလန်နေအောင် ဝတ်စားသွားစရာမလိုပါဘူး။ သပ်သပ်ရပ်ရပ်နဲ့ ကိုယ် နေနေကြပုံစံလေးပဲကောင်းပါတယ်။

Achievement - Academic record ကိုကြည့်ပါတယ်။ Bachelor တုန်းက grading ကောင်းခဲ့ရင် ပိုအဆင်ပြေပါတယ်။ ပြီးတော့ လုပ်ခဲ့တဲ့အလုပ်တွေနဲ့ လက်ရှိရာထူး အဖွဲ့အစည်းကို ကြည့်ပါတယ်။

Response and communication သွက်လက်ချက်ချာမှု English speaking အထိုက်အလျောက် ကောင်းမွန်မှု pro-active ဖြစ်ခြင်း positive-minded ဖြစ်ခြင်း တို့ကို ကြည့်ပါတယ်။

Commitment  ဒီသင်တန်းကို အလေးထားပြီး ပြီးဆုံးသည်အထိ မှန်မှန်တက်နိုင်မဲ့အကြောင်း တက်ချင်တဲ့အကြောင်းတွေ ပြောဖို့လိုပါတယ်။ ဝင်ခွင့်ရသွားပြီး အရမ်းကျောင်းပျက်သူများကို ဆရာမကြီးများ မနှစ်မြို့ပါ။ ပထမနှစ်က interviewမှာ ပြုတ်ခဲ့ပြီး ယခုနှစ်ပြန်လျှောက်တာဆိုရင် အဲဒီအကြောင်းကို ထည့်ပြောပါ။ အဲဒီလို ဇွဲမလျှော့ပဲ ထပ်ကြိုးစားတဲ့သူတွေကို chance ပေးလေ့ရှိပါတယ်။
Expectation သင်တန်းက ဘာတွေရမယ်ထင်လဲ ဘာကြောင့်လာတက်ချင်ရတာလဲ စသည်ဖြင့်ပေါ့။
-----------------------------------------------------------------------------------------------------------------

သင်တန်းတက်ရောက်ခြင်း
သင်တန်းကာလက ၂နှစ်ဖြစ်ပါတယ်။ Quarter တစ်ခု (သုံးလ) မှာ 3 subjects သင်ကြားရပါမယ်။ သင်တန်းချိန်က ညနေ (၅)နာရီခွဲက နေ (၇)နာရီခွဲအထိပါ။ တနင်္လာ ကနေစနေအထိပါ။ စနေနေ့က နေ့လည် ၂နာရီကနေ၄နာရီ တက်ရပါတယ်။ တစ်လခွဲကြာတဲ့အချိန်မှာ Mid-Term စာမေးပွဲ စစ်ပါတယ်။ သုံးလပြည့်ရင် Final Exam ပါ။ ပြီးတာနဲ့ နောက် Quarter မှာ subject အသစ် ၃ခု ထပ်သင်ကြားပါမယ်။ ပထမနှစ်ရဲ့ တဝက်လောက်မှာ ရန်ကုန်အနီးတဝိုက် Plant Trip လေ့လာရေးခရီးစဉ်ရှိပါမယ်။ Group အလိုက် report ပြန်တင်ရပါမယ်။ တစ်ဦးချင်းအလိုက်ရော Group အနေနဲ့ပါ Assignment, Presentation, Book Review စတာတွေ လုပ်ရပါမယ်။

သင်တန်း ဒုတိယနှစ်မှာ ပြည်တွင်း (သို့) ပြည်ပ လေ့လာရေးခရီးစဉ်ရှိပါတယ်။ 1st batch က Hongkong, China သွားခဲ့ပါတယ်။ 2nd batch က ပုပ္ပါး မိထ္ထီလာ မုံရွာ စသည်ဖြင့် အထက်မြန်မာပြည်ဖက်ထွက်ပါတယ်။ 3rd batch က ဧရာဝတီတိုင်းဖက်နဲ့ ကျွန်တော်တို့ 4th batch က Hongkong, China ကိုသွားပါတယ်။ အခု 5th batch ကတော့ ဘယ်သွားဖြစ်မယ် မသိသေးဘူး။

စာသင်နှစ် ၂နှစ်ပြီးရင် Term Paper တစ်ခုတင်ရပါတယ်။ (1) Industrial - လုပ်ငန်းတစ်ခု အသစ် ဆောင်ရွက်ဖို့  အသေးစိတ် လေ့လာပြီး ရေးရတဲ့ Term paper ပါ။ တီချယ်ကြီး ဒေါ်နုနုယဉ်နဲ့ ရေးရပါမယ်။ (2) Marketing, Consumer Behavior စတဲ့ subject area အောက်မှာလည်း ရေးနိုင်ပါတယ်။ တီချယ် ဒေါ်ခင်စန်းရီနဲ့ပါ။ ဒီနှစ်ခုအပြင် Business Ethics, HR, Organizational Design and Development, Captial market စသည်ဖြင့် တစ်ဦးစ နှစ်ဦးစ ရေးကြတာတွေလည်း ရှိပါတယ်။ စာအုပ်တင်ပြီးရင် နှုတ်ဖြေ ဖြေရပါမယ်။ ကိုယ်ရေးထားတာနဲ့ ပတ်သက်လို့ မေးမြန်းကြမှာပါ။

ဒီသင်တန်းရဲ့ အနှစ်သာရက စာသင်ကြားရတာအပြင် ကိုယ့်ရဲ့ social network ကို ချဲ့ထွင်နိုင်ခြင်းပါ။ လုပ်ငန်းအသီးသီးက အသက်၃ဝအထက် မန်နေဂျာနှင့်အထက်အဆင့်လူများနဲ့ သိကျွမ်းရ အတွေ့အကြုံနဲ့ အတွေးအမြင်တွေ ဖလှယ်ရတာကိုက အရမ်းကို တန်ဖိုးရှိပါတယ်။ ဒီသင်တန်းကို တက်ခွင့်ရခဲ့တယ် ဆိုကတည်းက သူတို့မှာလည်း ထူးချွန်တဲ့ အရည်အချင်းတွေရှိလို့ပေါ့။

ဆရာမကြီးတို့အနေနဲ့ ၂နှစ်တာကာလမှာ အများကြီးမသင်ပေးနိုင်တော့ အဓိကအနေနဲ့ mindset ကို change လုပ်ပေးဖို့ ကြိုးစားပါတယ်။ Positive Thinking ဖြစ်လာအောင် Pro-Active ဖြစ်လာအောင် ... management ရဲ့ အနှစ်သာရဖြစ်တဲ့ Getting things done through the people by the people ဆိုတာလေးကို မြင်အောင် တော့ အသေအချာ သင်ကြား လိုက်ပါတယ်။ ကျန်တဲ့ ဘာသာရပ်အလိုက် အသေးစိတ်ကတော့ ကိုယ်လိုက်လုပ်မှ ကိုယ်ရမှာပါ။ 

 ၃လအတွင်းမှာ ၃ဘာသာ သင်ရတာဆိုတော့ overview နဲ့ အရေးကြီးတာလောက်ပဲ point out လုပ်ပေးမှာပါ။ ကျန်တာက ကိုယ့်ဖာသာ ဆက်ပြီး လေ့လာရမှာပါ။ သင်တန်းကာလ ၂နှစ်ပြီးရင် Term paper တစ်စောင် ရေးရပါမယ်။ တီချယ်ကြီး ဒေါ်နုနုယဉ်နဲ့ Industrial ပိုင်း ရေးလို့ရပါတယ်။ လုပ်ငန်းအသစ်တစ်ခု တည်ထောင်မည်ဆိုတဲ့ပုံစုံနဲ့ ဘက်စုံ ဒေါင့်စုံက လေ့လာပြီး report ရေးတဲ့ပုံစံပါ။ Financial အတွက် Confer ဆိုတဲ့ programလေး runပြီးdata တွေ ထည့်သွင်းပေးရပါမယ်။ Investment ကဘယ်လောက် ဝင်ငွေ အသုံစရိတ်စသည်ဖြင့် ထည့်သွင်းပြီး သုံးလေးနှစ်စာလောက် runကြည့်လို့ရပါတယ်။ နောက်တစ်ခု အနေနဲ့ Marketing subject area အောက်မှာလည်း တီချယ် ဒေါ်ခင်စန်းရီနဲ့ ရေးလို့ရပါတယ်။ အခြား Organizational Design and Development, HR, Captial market  Business Ethic စသည်ဖြင့် တစ်ဦးစ နှစ်ဦးစ ရေးကြတာတွေလည်း ရှိပါတယ်။

ကုန်ကျစရိတ်အနေနဲ့ one quarter အတွက် ကျောင်းလခ 15000 နဲ့ အခြား အထွေထွေစရိတ် 5000 ပေါင်းရင် 20000 သွင်းရပါမယ်။ စာအုပ်ဖိုးအနေနဲ့ တစ်အုပ်ကို တစ်သောင်းခွဲလောက်နဲ့ 45000၊ Group fund, class fund 30000 လောက် ပေါင်းရင် သုံးလကို တစ်သိန်းလောက်ကုန်ပါမယ်။ အဲဒီမှာ ကျောင်းသွားကျောင်းပြန် ကားခ လမ်းစရိတ်မပါသေးဘူး။ ပြည်တွင်းခရီးစဉ်ရှိရင် နှစ်သိန်းလောက်နဲ့ နိုင်ငံခြားခရီးစဉ်ဆိုရင်တော့ ခုနစ်သိန်းလောက် ရှိဖို့လိုပါမယ်။

အတန်းအနေနဲ့ ရံပုံငွေရအောင် activity များပြုလုပ်နိုင်ရင် (ဥပမာ သင်္ကြန် မဏ္ဍတ်ဆောက်ခြင်း) long trip ထွက်တဲ့အခါ တစ်ဦးစီ စိုက်ရတဲ့ငွေ အထိုက်အလျောက် သက်သာနိုင်ပါမယ်။
ကျောင်းသွားကျောင်းပြန်ကတော့ တစ်လလောက်ကြရင် သင်တန်းသားခြင်း ရင်းနီးသွားကြတဲ့အခါ ကားရှိသူများက အခြားကျောင်းသားများကို နီးစပ်ရာ လာခေါ်ပေးခြင်း အပြန်မှာ အနီးဆုံးနေရာများ သို့ ခေါ်သွားပေးခြင်း ဆိုတာမျိုးတွေရှိပါတယ်။ ကျွန်တော်တက်ခဲ့တဲ့ ၂နှစ်တာမှာလည်း အချို့ရက်များမှာ ကိုယ့်ဖာသာ Taxi စီးရတာမှအပ အများအားဖြင့် သူငယ်ချင်းများက လာခေါ်ပေး အပြန် မြိုထဲဆူးလေနား အထိပို့ပေး တာမျိုးနဲ့ အဆင်ပြေခဲ့တာပါ။

EMBA ဆိုတာ ကလေးတန်းလို ကိုယ့်ပုံထဲ ဆရာ ဆရာမတွေက ရေခပ်ထဲ့ပေးမဲ့ သင်တန်း မဟုတ်ပါဘူး။ ရေရှိမဲ့နေရာတွေကို ညွှန်ပြပေးပြီး ကိုယ်တိုင် ကိုယ့်ပုံးထဲ ကြိုးစားပြီး ရေခပ်ထည့်ရမှာပါ။ တစ်ချို့တွေဆို ကလေးတန်းလိုပဲထင်ပြီး စာမေးပွဲအောင်ဖို့ စာသားတွေအလွတ်ကျက်တဲ့အဆင့်နဲ့ပဲ ပြီးဆုံးသွားခဲ့တာပေါ့။ ကိုယ့်ပုံးထဲသူများရေခပ်ပေးမယ်အထင်နဲ့ ... ၂နှစ်ကြာပြီးတော့လည်း ပုံးအလွတ်ကလေးနဲ့ ..... ဘွဲ့ဆိုတဲ့ လက်မှတ်လေးတစ်ခုတော့ ရလိုက်မှာပေါ့။

 

EMBA 4th batch, Group-5 Hongkong, China long trip