ငယ်ငယ်တုန်းက Weekend တွေ

ငယ်ငယ်တုန်းကဆိုတာ ကိုယ် တစ်တန်း နှစ်တန်း အရွယ်လောက်ကိုပြောတာ။ အဲဒီအချိန်တုန်းက လှည်းတန်း ကုန်းဆင်းနားက ကောင်စီရုံးဘေး ပန်းခြံလမ်းမှာနေကြတယ်။ အမေ လွိုင်ကော်ကို မပြောင်းရခင် လောက်ကပေါ့။ ကျောင်းပိတ်ရက် စနေ သို့မဟုတ် တနင်္ဂနွေ အဆင်ပြေတဲ့တစ်ရက်ရက်မှာ အဖေက မြို့ထဲမှာ ရုပ်ရှင်လိုက်ပြလေ့ရှိတယ်။ အိမ်ကနေ ငါးမိနစ်ကျော်ကျော်လောက် လမ်းလျှောက်လိုက်ရင် လှည်းတန်း ဘူတာကို ရောက်တယ်။ အဲဒီကနေ မြို့ပတ်ရထား စောင့်စီးကြတာပေါ့။ 

 

အဖေက အိမ်က နံရံတစ်ခုမှာ လှည်းတန်းဘူးတာက ရထားအချိန်တွေကို ရေးထားတယ်ဗျ။ မြို့ထဲဖက်ကို ဆိုဘယ်အချိန်တွေ အင်းစိန်ဖက်ကို ဆို ဘယ်အချိန်တွေ စသည်ဖြင့်ပေါ့ ... အိမ်ကထွက်တည်းက အချိန်ကိုက်ပြီး ထွက်လာတာပေါ့။ရထားတွေက တစ်ခါတစ်ရံ အနည်းငယ်နောက်ကျတာကလွဲလို့ မလာတာမရှိဘူးဗျ။ လှည်းတန်းဘူတာကနေ မြို့ထဲ ဘုရားလမ်းဘူတာအထိ စီးသွားရတယ်။ ရထားခက တစ်ယောက်ကို တစ်မတ်ပေါ့။ ဘုရားလမ်းဘူတာ ရောက်ရင်  စကော့စျေးကို ဖြတ်ထွက်ပြီး ဗိုလ်ချုပ်လမ်းအတိုင်း ရုပ်ရှင်ရုံတွေဖက် သားအဖနှစ်ယောက် လမ်းလျှောက်သွားကြတာပေါ့။ 

 

အဲဒီအချိန်က Traders Hotel ကြီးနေရာမှာ ပပဝင်းရယ် ဂုဏ်ရယ် နှစ်ရုံ ကပ်လျှက်ရှိတာလေ။ အခု Central Hotel နေရာက မီးလောင်သွားတဲ့တော်ဝင်ရုပ်ရှင်ရုံ အပျက်ကြီးရှိတယ်။ ရုပ်ရှင်ကြည့်ခက အပေါ်ထပ် ၅ကျပ်၊ အောက်ထပ်ကို ၄ကျပ်။ ကျွန်တော်က ငယ်သေးတော့ လက်မှတ်ဝယ်စရာ မလိုဘူး။ လက်မှတ် တစ်စောင်ပဲ ဝယ်ပြီး အဖေ့ပေါင်ပေါ် ထိုင်ကြည့်ရတာပေါ့။ ရုံထဲမဝင်ခင် အဖေက နို့အေးချောင်းဝယ်ကျွေးလေ့ရှိတယ်။ တစ်ကျပ်။ တစ်ခါတစ်လေ ရေငတ်ရင် ရေခဲရေသည်ဆီက တစ်ခွက် တစ်မတ်နဲ့ ရေခဲရေသောက်တာပေါ့။ 

 သံရေပုံးလေးပေါ်မှာ ရေစစ်လေးနှစ်ခုလောက်ကို သံဖရိမ်နဲ့တပ်ထားပြီး  ရေခဲတုံးလေး တင်ထားတာ။  သောက်မဲ့သူလာမှ လ ရေပုံးထဲကရေကို ရေခဲတုံးပေါ်လောင်းချပြီး အောက်ကခွက်လေးခံထား နောက်နှစ်ခါ သုံးခါလောက်လောင်း ပြီး ပေးတာပေါ့။ အဲဒီတုန်းက ရေသန့်ဗူး ဆိုတာလဲ  မရှိသေးပါဘူး။

တစ်ချို့ရက်တွေမှာ ရုပ်ရှင်ကြည့်ပြီးရင် လေဟာပြင်ဖက် လမ်းလျှောက်ပြီး ဆီချက်တို့ ကော်ရည်ခေါက်ဆွဲတို့၊ အခေါက်ကင် အသားကင်နဲ့ ထမင်းပေါင်းလဲ လိုက်ကျွေးလေ့ရှိတယ်။ နှစ်ယောက်စားတာ အလွန်ဆုံး တစ်တယ် ဆယ့်နှစ်ကျပ်ပေါ့။ ပြီးရင် မြို့ပတ်ရထား၊ သို့မဟုတ် နံပါတ် (၈) လိုင်းကားနဲ့ အိမ်ပြန်ကြတာပေါ့။
ကြာခဲ့ပြီပေါ့။ မနေ့ညက သားလေးကို ကြည့်နေရင်း အဲဒီအကြောင်းလေးတွေ ခေါင်းထဲပြန်ပေါ်လာလို့။ သားလေး နည်းနည်းကြီးလာရင် အဖေက ကျွန်တော့်ကို ရုပ်ရှင်လိုက်ပြခဲ့သလိုပဲ သားလေးကို လဲလိုက်ပြရမယ် လို့ တွေးနေမိတယ်။ ပျော်စရာကြီး .....