Monday, November 12, 2007

မြန်မာရေဒီယိုလိုင်းသစ်

မနက်ကအိပ်ယာနိုးတော့ ခြောက်နာရီခွဲပြီ။ ရွာမှာက ရန်ကုန်ထက်နည်းနည်းပိုအေးတယ်။ မျက်နှာသစ်ဖို့အောက်ဆင်းလာရင်း စတီရီယိုသီချင်းသံကြားလိုက်ရတယ်။ ရေဒီယိုကလာနေတာ။ ပဲခူးနားက ရွာလေးဆိုတော့ City FM လဲဖမ်းလို့မရဘူး။ မေးကြည့်တော့ နေပြည်တော်ကလွှင့်တဲ့သီချင်းလိုင်းသစ်တဲ့။ (နေပြည်တော်က လွှင့်တာဟုတ်မဟုတ်တော့မသိဘူးဗျ။ ရွာသားတွေကတော့ ဒီလိုပဲလက်ခံထားတာ။) မနက်စောစော ဘီဘီစီ၊ ဗွီအိုအေ လာချိန်မှာ သူကလည်းလာနေပြီ။ လူကြီးတွေက အဲဒီလိုင်းတွေဖမ်းကြ ကလေးတွေက ခုနကပြောတဲ့ သီချင်းလိုင်းကိုဖမ်းကြပေါ့။ ရွာမှာက လျှပ်စစ်မီးမရတော့ ဓါတ်ခဲထည့်တဲ့ ဒီလို ရေဒီယိုလေးတွေကို ပဲအဖွင့်များတယ်။ ဟိုးအရင်တုန်းကတော့ မြန်မာ့အသံတစ်ခုပဲရှိတာပေါ့။


အခုလိုင်းက လှိုင်းလတ် KHz 580 ပတ်ဝန်းကျင်ကလာတာ။ သီချင်းသုံးလေးပုဒ်လာလိုက် သတင်းလိုလို ပြောချင်တာတွေပြောလိုက်ပေါ့။ ဥပမာ ... ကုလသမ္မက ရဲ့ မြန်မာဌာနေ၀န်ထမ်းတွေဟာ ဒီမှာနေထိုင်လုပ်ကိုင် နေကြတာဆိုတော့ မြန်မာပြည်ရဲ့ တိုးတက်ဖွံဖြိုးနေတာတွေကို ပိုပြီးတောင်သိသင့်ပါတယ်တဲ့။ အသားတင်ထုတ်လုပ်မှုကတော့ ဘယ်လောက် ဘယ်လောက်ပါ ... မတည်ငြိမ်တဲ့ငွေလဲလှယ်မှုနှုန်းထားနဲ့ ဆုံးဖြတ်ပြီး ကြေငြာ စာတန်းတွေထုတ်တာတော့ မှားယွင်ပါတယ်ရှင် .... ဘာညာနေကြာကွာစိပေါ့။ ရွာကအေးမြင့်အောင်တို့ ညီအမတစ်တွေကတော့ သီချင်းနားထောင်ဖို့ဖွင့်ကြတာပေါ့။ ဆေးလိပ်လိပ်ကြရင်း သီးချင်းလေးဖွင့်ထားတာပေါ့။

ရွာလေးလို တောနယ်ဖက်တွေမှာ City FM ဖမ်းမရတော့ သီချင်းလေးသုံးလေးပုဒ်ဖွင့်လိုက် ပေါ်လစီလေးတွေ သတင်းလိုလိုလေးတွေ ပြောချင်တာလေးပြောလိုက်ပေါ့။ ရွာသားတွေအတော်များများတော့ဖွင့်ကြတယ်ဗျ။ နိုင်ငံခြားရေဒီယိုလိုင်းများကို counter လုပ်ဖို့ သက်ဆိုင်ရာကလွှင့်တယ်ထင်ပါတယ်။ ဘာပဲဖြစ်ဖြစ်ရွာသားတွေကတော့ သီချင်းတွေနားထောင်ရလို့ ပျော်နေကြတယ်။ နိုင်လင်းတို့ညီအကိုတွေဆို ဒီရက်ပိုင်း လယ်ထဲကတဲမှာပဲအိပ်ရတယ်။ လူငယ်ဆိုတော့ ဘီဘီစီ ဘီအိုအေလဲ အကြာကြီးနားထောင်ဖို့ စိတ်မ၀င်စားတော့ အခုလိုင်းလေးဖွင့်ပြီး အချိန်ဖြုန်းကြပေါ့။ ညပိုင်းလဲလာတယ်ဗျ။ လွှင့်ချိန်အတိအကျတော့ ကျွန်တော်မသိဘူး။

No comments: